Wednesday, November 8, 2017

भाई, आज तुमचा वाढदिवस

आदरणीय भाई,
स. न. वि .वि ……

भाई, आज तुमचा वाढदिवस… … अर्थातच तुमचा 'वाढदिवस' हा आमच्यासाठी 'दसरा' 'दिवाळी' चा 'सण' जणू… अगदी आपल्या जवळच्या जिवलग माणसांवर आपण जशी प्रेमाची उधळण करायला सदा तत्पर असतो तसंच तुमच्या बाबतीत आम्हा चाहत्यांचं होतं …ज्याला आम्ही आमच्या महाराष्ट्राचं लाडकं व्यक्तिमत्व म्हणतो… .

मी तुमची एक चाहती … आज मी तुम्हाला पत्र रूपाने भेटण्याचा अट्टाहास केला आहे… पत्र रूपाने तर का सांगायचे तर तुमचं संगीत असलेला 'देवबाप्पा' हा माझा सर्वात आवडता सिनेमा…ह्या सिनेमाची एक माझी छोटी मनात जपलेली आठवण आहे। हा सिनेमा मी माझ्या लहानपणी माझ्या काकांबरोबर पाहायला गेले होते… माझ्या काकाने धरलेला माझा हात गर्दीत सुटला आणि काही काळ मी हरवले होते….एका बाजूला उभी राहून खूप रडले होते … पण काही वेळातच मी काकाला मात्र सापडले…

त्या चित्रपटात 'देवबाप्पाला पत्र लिहिलं जातं… आज मी आमच्या या लाडक्या मनातील देवाला पत्र लिहित आहे… आता तुम्हाला पत्र लिहिताना देखील माझ्या कानाला गाणं ऐकू येत आहे… "नाच रे मोरा नाच"… आणि तुमच्या आठवणीने डोळे सुद्धा भरून आले आहेत ओ ! …

अहो ! हल्ली गल्लो गल्ली काय राजकारणात काय स्वतःला 'भाई' म्हणवणारे व 'भाईगिरी' करणारे खोऱ्याने असतात पण आम्ही 'भाई' म्हणून तुम्हालाच जाणतो… आमच्या द्र्ष्टीने दुसरा कुणी 'भाई' होऊ शकत नाही. ज्यांनी माणसांच्या हृदयावर 'राज' करून मनावर 'भाईगिरी' केली आणि तेच आमच्या शेवटच्या श्वासापर्यत करत राहणार . आमच्या 'भाई' ना दुसरा कुठलाही पर्याय नाही

भाई, तुम्हाला खरं सांगू का… आज कोण जाणे पण सकाळ पासून तुमची खूप खूप आठवण येत आहे. तशी ती रोजच येत असते म्हणा .रोज सकाळी उठल्यावर उगवत्या सूर्याचे दर्शन घेऊन मी माझ्या दिनक्रमाला सुरवात करते…आज त्या तेजपुंज सूर्याला वाकून नमस्कार करताना तुमचं दर्शन झालं असं वाटलं … आमच्या 'ध्यानी मनी' तुम्हीच आहात ना ? म्हणून देवाने मला थेट माझं मन प्रसन्न करणारं असं तुमचं दर्शनच मला दिलं.

तुम्हाला सांगायचे तर तशी तुमची आमची 'गाठ भेट' होत असते…कधी नाथा कामत, नारायण होऊन तर कधी सखाराम गटणे, मास्तर होऊन तर नामू परीट, पानवाला होऊन .. पण हि 'भेट' घडवून तुम्हीच आणता हे मात्र नक्की … अहो, अशावेळी तुमची आमची 'गळाभेट' झाल्याचा परमोच्च आनंद आम्हाला होत असतो. तो आम्हाला होणारा आनंद गगनात न मावता खूप सारं मानसिक समाधान देऊन जातो…. आमच्या चेहऱ्यावर स्मित आणण्यात तुमचा महत्वाचा मोलाचा वाटा आहे. हे तुम्हाला मान्यच करावे लागेल…तुम्ही हे कधीच नाकारू शकणार नाही.

तुम्ही, आम्हाला केवळ संस्कार दिले नाहीत तर त्याच बरोबर अवलोकन करून पराकोटीचा विचार करायला सुद्धा शिकवलं आहे .कानसेन होऊन चांगल्या संगीतावर प्रेम करायला शिकवलं आहे. आणि ते श्रवण केल्याने दुखं कसं हलकं होतं हे देखील आमच्या मनावर बिंबवल आहे. ह्याचा मला बरेचं वेळा अनुभव आला आहे.उदाहरण म्हणून द्यायचे झाल्यास 'देसाई मास्तरांच्या मजेशीर शैलीतील सदा आठवणीत राहणारी मेहफिल'…हेच मी देईन…

तुम्ही, आमच्यासाठी काय आहात म्हणून काय सांगू…. तुम्ही म्हणजे आमच्या जीवनातील चैतन्य आहात… आमच्या जगण्यातील 'संजीवनी' आहात… तुम्ही आम्हाला बहाल ज्ञानाचा माधुर्य टिकवणारा मधुर झरा बहाल केला आहे. ज्या मध्ये वेळचे बंधन न पाळता आम्ही 'नखशिखांत' भिजायला तयार असतो.

तुम्ही केललं 'प्रवास वर्णन' म्हणजे आमच्या साठी एक वेगळा मजेशीर अनुभव असतो… .आम्ही आमच्या रोजच्या जीवनात आजूबाजूला इतकी वेगवेगळ्या स्वभावाची विचारांची चित्र विचित्र मानसं पाहत असतो. काही लक्षात राहतात तर काहीना आम्ही पार विसरूनही जातो. पण तुमच्या 'व्यक्तींना' तुम्ही तुमच्या लिखणातून आमच्या मनात कायमचं अढळ स्थान दिलं आहे. कि ज्यांना आम्ही कधी विसरू शकत नाही… मग ते अंतू बर्वा, चितळे मास्तर असो किंवा नारायण, सखाराम, गटणे असो. या सारख्या अनेक तुमच्या 'व्यक्तिरेखा' आमच्या मनात चिरकाल स्मरणात राहणार आहेत.

तुम्ही लेखक, कवी संगीतकार, पेटी वादक ( पेटीला ला 'संवादिनी\ म्हणतात हे सांगणारा तुमचा किस्सा मला नेहमी आठवतो) कथाकथनकार, वक्ता,नाटककार, कलाकार, अजून तुम्ही काय नव्हता हेच मला माहिती नाही…कुणीही 'सर्वगुणसंपन्न' नसतं असं म्हणतात… पण ह्याला तुम्ही एकमेव अपवाद आहात… तुमच्या अंगी इतके सारे गुण खचाखच भरले आहेत कि गुणांनी देखील लाजावं.हे तुमचं नुसतं कौतुक नाही तर वास्तव आहे… आणि उभ्या महाराष्ट्राने ते मान्य केलं आहे…

तसं पाहिलं तर आम्ही तुम्हाला कधीहि विसरू नये असं साहित्य नाटक,चित्रपट संगीत असं कलेचे विशाल भांडार तुम्ही आम्हाला तुमच्यातील दानशूर वृत्तीने 'दान' म्हणून दिलं आहे…तुमचा हा अनमोल खजिन्यातील ठेवा आमच्याकडून पिढ्यानपिढ्या जपला जाईल ह्याची मला खात्री आहे… तुम्ही सुद्धा ते कौतुकाने पाहत असालच ना ? … कि तुमचा अखंड 'वावर' सतत आमच्या हृदयात रात्रंदिवस चालू असतो…ते !

भाई, पत्र पूर्ण करण्याची इच्छा होत नाही …. शेवटी एवढेच सांगेन कि तुम्ही आम्हाला साहित्याची देणगी जी दिली आहे त्याची 'गोळा बेरीज' कुणाला देखील मांडता येणार नाही. मग तो नावाजलेला 'गणितीतज्ञ' असला तरी… असो

कळावे ,आपला हा न संपणारा संवाद अखंड चालूच राहील…

तुमची एक चाहती
मुग्धा भिडे, पुणे
https://www.facebook.com/mugdha.bhide.7


0 प्रतिक्रिया: